Canllawiau ar awdurdodi bwyd anifeiliaid at ddefnydd maethol neilltuol (PARNUTs)

Mae PARNUTs yn fwydydd at ddibenion maethol neilltuol, a elwir hefyd yn fwyd anifeiliaid deietegol. Mae'n fwyd anifeiliaid sydd â dibenion maethol neilltuol sy’n cael ei roi i anifeiliaid am resymau iechyd. Mae PARNUTs yn diwallu anghenion maethol neilltuol anifeiliaid y mae eu swyddogaethau corfforol â nam dros dro neu nam anghildroadwy (irreversible).

Gall PARNUTs fodloni pwrpas maethol neilltuol trwy:

• gyfansoddiad penodol
• dull cynhyrchu penodol

Dylai bwyd anifeiliaid at ddibenion maethol neilltuol ond gael ei farchnata ym Mhyrdain Fawr os:

• yw'r defnydd a fwriadwyd wedi'i gynnwys yn y rhestr o ddefnyddiau a fwriadwyd
• yw'n bodloni'r nodweddion maethol hanfodol at y diben maethol neilltuol a gynhwysir ar y rhestr honno

Mae Rheoliad a gymathwyd (UE) 2020/354 wedi sefydlu rhestr o'r defnyddiau arfaethedig ar gyfer bwyd anifeiliaid a fwriadwyd at ddibenion maethol neilltuol.

Gellir cychwyn y weithdrefn ar gyfer diweddaru'r rhestr o ddefnyddiau arfaethedig trwy gyflwyno cais.

Ceisiadau newydd

Defnyddiwch ein gwasanaeth gwneud cais am gynnyrch rheoleiddiedig i wneud cais i ddiweddaru'r rhestr ym Mhrydain Fawr trwy:

• ychwanegu defnydd arfaethedig PARNUT
• ychwanegu neu newid yr amodau sy'n gysylltiedig â defnydd penodol arfaethedig PARNUT

Gofynnir i chi ddefnyddio'r gwasanaeth i lanlwytho’r holl ddogfennau i gefnogi’ch cais, a fydd yn llunio’ch coflen (dossier).  Nid oes unrhyw ffi am y cais.

Nid oes unrhyw ganllawiau penodol ar gael ar gyfer newidiadau i gategorïau PARNUTs. Dylai eich ffurflen gais nodi'r cais yn glir a chynnwys ffeil ategol sy'n dangos bod cyfansoddiad penodol y bwyd anifeiliaid:

• yn cyflawni'r pwrpas maethol neilltuol a fwriadwyd
• nad yw’n cael unrhyw effeithiau andwyol ar iechyd anifeiliaid, iechyd pobl, yr amgylchedd na lles anifeiliaid

Ceisiadau parhaus

Os gwnaethoch gyflwyno cais am gategori PARNUTs newydd neu newid i gategori presennol i'r UE cyn 1 Ionawr 2021 ac nad yw'r broses o ystyried y cais hwn wedi'i chwblhau, bydd angen i chi gyflwyno'ch cais i ni, gan ddefnyddio ein gwasanaeth gwneud cais am gynnyrch rheoleiddiedig.

Faint o amser fydd fy nghais yn ei gymryd? 

Mae'r gyfraith yn cynnwys dyddiadau ar gyfer camau allweddol yn y broses. Yn y rhan fwyaf o achosion, bydd ceisiadau'n cymryd o leiaf blwyddyn.  

Bydd ansawdd y goflen a'r wybodaeth a ddarperir, yn effeithio'n sylweddol ar yr amser sydd ei angen ar gyfer asesu ac awdurdodi. Rydym ni’n annog ymgeiswyr i ddarparu cymaint o wybodaeth â phosibl i sicrhau y gallwn ni brosesu'ch cais mor effeithlon â phosibl. 

Cymorth

Os oes gennych chi unrhyw gwestiynau am y weithdrefn awdurdodi neu'r gofynion gwneud cais, gallwch chi gysylltu â ni drwy regulatedproducts@food.gov.uk

Gwneud cais