Rydym yn croesawu adborth a chŵynion ac rydym am wneud popeth o fewn ein gallu i ddysgu ohonynt fel y gallwn ddarparu gwasanaeth gwell.
Gallwch chi roi gwybod i ni os:
- ydych yn anhapus gyda’r gwasanaeth a gewch gan yr Asiantaeth Safonau Bwyd (ASB)
- ydych yn anhapus ag ymddygiad neu weithredoedd aelod o staff a gyflogir gan yr ASB neu ar ei rhan
- nad yw aelod o’n staff mewn rôl sy’n wynebu’r cyhoedd yn bodloni’r safonau angenrheidiol o ran rhuglder llafar yn y Gymraeg neu’r Saesneg, a elwir yn ‘ddyletswydd rhuglder’
Nid yw’r ASB yn gyfrifol am gŵynion am gynhyrchion neu wasanaethau bwyd a ddarperir gan fusnes bwyd. Er mwyn gwneud cwyn am gynhyrchion bwyd, gallwch chi ddefnyddio ein gwasanaeth rhoi gwybod am broblem bwyd i awdurdod lleol y busnes.
Sut i wneud cwyn am yr ASB
Gallwch wneud cwyn am yr ASB drwy ddefnyddio ein ffurflen ar-lein.
Gallwch hefyd anfon llythyr at:
Cydlynydd Cwynion yr ASB
Yr Asiantaeth Safonau Bwyd
Complaints and Transparency Team
Foss House
Kings Pool
1–2 Peasholme Green
Caerefrog YO1 7PR
Os bydd angen help arnoch i wneud cwyn, gallwch ein ffonio ar 0330 332 7149.
Dylech chi wneud y gŵyn o fewn 1 mis calendr ar ôl i chi ddod yn ymwybodol o’r mater.
Dywedwch wrthym a ydych am i fanylion eich cwyn gael eu cadw’n ddienw ac yn gyfrinachol pan fyddwch yn cysylltu â ni gyntaf.
Darllenwch bolisi cwynion llawn yr ASB.
Beth fydd yn digwydd nesaf
Byddwn yn ymchwilio i'ch cwyn yn drylwyr.
Byddwn yn ysgrifennu atoch gydag ymateb llawn:
- o fewn 20 diwrnod gwaith wedi i'ch cwyn ddod i law, os yw eich cwyn yn cael ei adolygu'n lleol
- o fewn 40 diwrnod gwaith os yw eich cwyn yn cael ei adolygu gan Gydlynydd Cwynion yr ASB neu'r Prif Weithredwr
Os nad yw’n bosibl ymateb o fewn yr amser hyn, byddwn ni'n esbonio pam ac yn dweud pryd y byddwch chi'n cael ateb llawn. Byddwn ni hefyd yn dweud wrthych sut i uwchgyfeirio'ch cwyn os nad ydych yn hapus gyda'r ymateb. Bydd hyn yn cynnwys manylion ar sut y gallwch chi ofyn i’r Ombwdsmon ymchwilio i’ch cwyn a’r modd y caiff ei thrin.
Ein nod yw bodloni Safonau Cwynion Llywodraeth Ganolog y DU yr Ombwdsmon Seneddol a Gwasanaeth Iechyd wrth ymdrin â chŵynion. Mae’r safonau hyn yn ein helpu i ddarparu gwasanaeth cyflymach a symlach ar gyfer ymdrin â chŵynion, sy’n cyflawni’r canlynol:
- hyrwyddo diwylliant lle rydym yn dysgu
- croesawu cwynion mewn ffordd gadarnhaol
- bod yn drylwyr ac yn deg
- rhoi ymatebion teg ac atebol
Cwynion ynglŷn â Swyddogion Troseddau Bwyd
Os yw’ch cwyn yn ymwneud ag ymddygiad un o swyddogion troseddau bwyd yr Uned Genedlaethol Troseddau Bwyd (NFCU), a defnydd o’n pwerau gorfodi ehangach o dan Ddeddf yr Heddlu a Thystiolaeth Droseddol 1984 a Deddf Cyfiawnder Troseddol a Threfn Gyhoeddus 1994, dylech gyfeirio eich cwyn at Swyddfa Annibynnol Ymddygiad yr Heddlu (IOPC). Mae gen yr IOPC yr awdurdod i ymchwilio i gŵynion o’r fath. Gallwch gael gwybod sut i gyflwyno cwyn i’r IOPC ar dudalen gŵynion yr IOPC.
Cwynion ynglŷn â safonau Cymraeg neu Saesneg llafar
Os yw eich cwyn yn ymwneud â’r ‘ddyletswydd rhuglder’, byddwn yn rhoi gwybod i’r aelod o staff sy’n destun y gŵyn. Bydd cyfle iddo roi ei farn am y ffeithiau a arweiniodd at y gŵyn.
Ni fydd cwyn yn erbyn acen, tafodiaith, dull neu dôn cyfathrebu, tarddiad neu genedligrwydd aelod o staff yn cael ei hystyried yn gŵyn gyfreithlon o dan y ddyletswydd rhuglder.
Cwynion am ein Gwasanaethau Cymraeg
Mae gwybodaeth am gŵynion mewn perthynas â’n Cynllun Iaith Gymraeg a gwasanaethau ar gael ar y dudalen Cynllun Iaith Gymraeg.
Sylwadau
Rydym hefyd yn falch iawn o gael canmoliaeth amdanom ni neu unrhyw un o’n staff. Gallwch hefyd wneud awgrym ar sut i wella ein gwasanaeth.
Gallwch anfon unrhyw ganmoliaeth neu sylwadau drwy anfon e-bost atom drwy fct@food.gov.uk.