Gofynion o ran awdurdodi cyflasynnau (flavourings) bwyd a'r hyn sydd angen i chi ei gyflwyno fel rhan o'ch cais.
Defnyddir cyflasynnau er mwyn:
- ychwanegu blas neu arogl newydd i fwyd
- gwella blas neu arogl presennol bwyd
Mae cyflasyn masnachol yn aml yn gymysgedd cymhleth o wahanol sylweddau a ddewisir i ddarparu'r blas a ddymunir.
Deddfwriaeth cyflasynnau
Rhaid i bob cyflasyn a phob cyfansoddyn o gyfuniad cyflasyn fod yn ddiogel o dan ddeddfwriaeth cyfraith bwyd gyffredinol. Yn ogystal, rhaid i rai cyflasynnau gael eu gwerthuso'n ddiogel cyn eu hawdurdodi i'w defnyddio mewn bwyd ym Mhrydain Fawr. Mae deddfwriaeth yr UE a ddargedwir (retained EU law) ar y weithdrefn awdurdodi gyffredin ar gyfer ychwanegion bwyd, ensymau bwyd a chyflasynnau bwyd yn amlinellu'r weithdrefn awdurdodi ar gyfer y sylweddau hyn.
Mae angen awdurdodi'r mathau hyn o gyflasynnau:
- sylweddau cyflasynnau
- paratoadau cyflasynnau a gafwyd o ddeunyddiau heblaw bwyd
- cyflasynnau proses thermol os yw cynhwysion yn dod o ddeunyddiau ffynhonnell heblaw bwyd neu os na chyflawnir yr amodau neu'r terfynau cynhyrchu a osodir yn Atodiad V o Reoliad 1334/2008 yr UE a ddargedwir (retained EU law)
- rhagsylweddyn (precursor) blas a gafwyd o ddeunydd ffynhonnell heblaw bwyd
- cyflasynnau eraill
- deunyddiau ffynhonnell heblaw bwyd
Gallwch chi ddod o hyd i restr o sylweddau cyflasynnau awdurdodedig a 'chyflasynnau eraill' i'w defnyddio mewn bwyd ym Mhrydain Fawr yn Atodiad I o Reoliad 1334/2008 yr UE a ddargedwir.
Awdurdodiad newydd
I wneud cais i awdurdodi cyflasyn ym Mhrydain Fawr, defnyddiwch ein gwasanaeth gwneud cais am gynnyrch wedi’i reoleiddio. Ar ôl llenwi'r ffurflen gais, anfonir dolen atoch lle gallwch lanlwytho dogfennau cais a fydd yn ffurfio'ch coflen (dossier). Nid oes unrhyw ffi am y cais.
Dylai eich cais i awdurdodi cyflasyn gynnwys:
- llythyr cysylltiedig yn rhoi amlinelliad o'r cais (yn nodi'r sylwedd, ei ddefnydd arfaethedig, a'r categorïau bwyd perthnasol y mae'r cais yn ymwneud â nhw)
- coflen dechnegol
- crynodeb o'r goflen
- crynodeb cyhoeddus o'r goflen
- gwybodaeth gyswllt yr ymgeisydd/ymgeiswyr ac arbenigwyr technegol
Os ydych chi am i rai rhannau o'r ffeilo’r goflen gael eu trin yn gyfrinachol, mae angen i'ch cais gynnwys:
- rhestr o rannau o'r goflen yr hoffech iddynt gael eu trin yn gyfrinachol
- cyfiawnhad dilysadwy ar gyfer pob rhan y gofynnir iddynt gael eu trin yn gyfrinachol
- coflenni cyflawn heb rannau cyfrinachol
Canllawiau manwl
Mae canllawiau hefyd wedi’u datblygu’n flaenorol gan Awdurdod Diogelwch Bwyd Ewrop (EFSA) ac maent yn parhau i fod yn berthnasol gan fod ein dull yn seiliedig ar brosesau'r UE.
Dylech ddilyn y rhannau sy'n ymwneud â datblygu coflenni yn unig ac nid y broses ymgeisio.
Ceisiadau parhaus
Os gwnaethoch gyflwyno cais am gyflasyn i'r UE cyn 1 Ionawr 2021 ac nad yw'r broses asesu ar gyfer y cais hwn wedi'i chwblhau, bydd angen i chi gyflwyno'ch cais i ni gan ddefnyddio ein gwasanaeth gwneud cais am gynhyrchion wedi’u rheoleiddio. Wrth lenwi'r ffurflen gais, gofynnir i chi ddarparu'ch rhif cwestiwn EFSA.
Awdurdodi cyflasynnau troednodiadau
Os yw'ch cyflasyn wedi'i gynnwys yn Atodiad I o Reoliad 1334/2008 gan y Comisiwn Ewropeaidd cyn 1 Ionawr 2021 a bod y ddeddfwriaeth angenrheidiol yn berthnasol, bydd yr awdurdodiad hwnnw'n parhau'n ddilys ym Mhrydain Fawr.
Nid yw EFSA wedi cwblhau gwerthuso sylweddau cyflasynnau sydd wedi'u marcio â throednodyn yn Atodiad I Rhan A o Reoliad 1334/2008. Bydd y sylweddau hyn yn parhau i gael eu caniatáu ym Mhrydain Fawr nes bod yr Asiantaeth Safonau Bwyd yn gorffen gwerthuso. Byddwn ni maes o law yn nodi ein cynlluniau ar gyfer gorffen gwerthuso'r sylweddau hyn a gofyn am gyflwyno gwybodaeth i ganiatáu i'r gwerthusiadau gael eu cwblhau. Yn y cyfamser, efallai y byddwn ni’n gofyn am wybodaeth am sylweddau cyflasyn unigol fesul achos.
Awdurdodiadau presennol
Os awdurdodwyd eich cyflasyn gan y Comisiwn Ewropeaidd cyn 1 Ionawr 2021 a bod y ddeddfwriaeth angenrheidiol yn berthnasol, bydd yr awdurdodiad hwnnw'n parhau'n ddilys ym Mhrydain Fawr ac nid oes angen i chi wneud cais am awdurdodiad.
Faint o amser fydd fy nghais yn ei gymryd?
Mae'r gyfraith yn cynnwys dyddiadau cau ar gyfer camau allweddol yn y broses ar gyfer asesu risg ac ystyriaethau rheoli risg. Yn y rhan fwyaf o achosion, bydd ceisiadau'n cymryd o leiaf blwyddyn. Nid yw'r llinellau amser yn berthnasol ar gyfer sylweddau troednodyn.
Bydd ansawdd y goflen a'r wybodaeth a ddarperir, yn effeithio'n sylweddol ar yr amser sydd ei angen ar gyfer asesu ac awdurdodi. Rydym ni’n annog ymgeiswyr i ddilyn y canllawiau a darparu cymaint o wybodaeth â phosibl i sicrhau y gallwn ni brosesu'ch cais mor effeithlon â phosibl.
Cymorth
Os oes gennych chi unrhyw gwestiynau am y weithdrefn neu’r broses awdurdodi, gallwch chi gysylltu â ni drwy regulatedproducts@food.gov.uk
Gwneud cais am awdurdodiad