Bwyd a Chi 2, Cylch 7: Pennod 2 - Pryderon am fwyd

Cyflwyniad

Gwaith yr ASB, fel y nodir yn y gyfraith, yw diogelu iechyd y cyhoedd a diogelu buddiannau defnyddwyr mewn perthynas â bwyd. Mae’r ASB yn defnyddio arolwg Bwyd a Chi 2 i fonitro pryderon defnyddwyr am faterion bwyd, fel diogelwch bwyd, maeth, a materion amgylcheddol. Mae’r bennod hon yn rhoi trosolwg o bryderon yr ymatebwyr am fwyd.  

Pryderon cyffredin

Gofynnwyd i’r ymatebwyr ddweud a oedd ganddyn nhw unrhyw bryderon am y bwyd maen nhw’n ei fwyta. Nid oedd gan y mwyafrif o’r ymatebwyr (72%) unrhyw bryderon, a dim ond 28% o’r ymatebwyr a ddywedodd fod ganddyn nhw bryder.  ^{(footnote 1)}

Ffigur 4. Y pryderon mwyaf cyffredin am fwyd a fynegwyd heb anogaeth

Newid i weld tabl a fersiwn hygyrch

Newid i weld siart

Math o bryder	Canran yr ymatebwyr a nododd bryder (%)
Gofynion dietegol (ddim yn gysylltiedig â gorsensitifrwydd i fwyd)	6
Labelu bwyd	8
Diogelwch a hylendid bwyd	11
Tarddiad bwyd	12
Dilysrwydd bwyd	13
Halogiad bwyd	14
Materion amgylcheddol a moesegol	17
Ansawdd bwyd	23
Maeth ac iechyd	30
Dulliau cynhyrchu bwyd	33

Lawrlwytho’r siart hon

Delwedd .csv

Ffynhonnell: Bwyd a Chi 2: Cylch 7

Gofynnwyd i’r ymatebwyr a ddywedodd fod ganddyn nhw bryder esbonio’n gryno eu pryderon am y bwyd maen nhw’n ei fwyta. Roedd y pryderon mwyaf cyffredin yn ymwneud â dulliau cynhyrchu bwyd (33%), maeth ac iechyd (30%), ac ansawdd bwyd (23%) (Ffigur 4).  ^{(footnote 2)}

Ffigur 5. Y pryderon mwyaf cyffredin am fwyd a fynegwyd gydag anogaeth

Newid i weld tabl a fersiwn hygyrch

Newid i weld siart

Math o bryder	Canran yr ymatebwyr (%)
Faint o fraster sydd mewn bwyd	47
The amount of calories in food	47
Hormones, steroids or antibiotics in food	40
The use of additives	42
Hylendid bwyd wrth fwyta allan	48
Hylendid bwyd wrth archebu o siopau tecawê	49
Lles anifeiliaid	49
Gallu bwyta’n iach	49
Faint o ddeunydd pecynnu bwyd a ddefnyddir	56
Ansawdd y bwyd	56
Faint o siwgr sydd mewn bwyd	56
Gwastraff bwyd	58
Prisiau bwyd	72

Lawrlwytho’r siart hon

Delwedd .csv

Ffynhonnell: Bwyd a Chi 2: Cylch 7

Gofynnwyd i’r ymatebwyr ddweud a oedd ganddynt bryderon am nifer o faterion sy’n gysylltiedig â bwyd, gan ddewis o blith rhestr o ddewisiadau. Y pryder mwyaf cyffredin oedd prisiau bwyd (72%). Pryderon cyffredin eraill oedd gwastraff bwyd (58%), faint o siwgr sydd mewn bwyd (56%), ansawdd bwyd (56%), a faint o ddeunydd pecynnu a ddefnyddir (56%) (Ffigur 5). ^{(footnote 3)}

Ffigur 6. Lefel y pryder am faterion sy’n ymwneud â bwyd

Newid i weld tabl a fersiwn hygyrch

Newid i weld siart

Pwnc yn ymwneud â bwyd	Ddim yn bryderus o gwbl	Ddim yn bryderus iawn	Ychydig yn bryderus	Yn bryderus iawn
Bwyd a gynhyrchir yn y DU yn cyd-fynd â’r hyn sydd ar y label	11	36	34	15
Argaeledd amrywiaeth eang o fwyd	10	33	37	15
Diogelwch a hylendid bwyd a gynhyrchir yn y DU	10	33	35	19
Bwyd o’r tu allan i’r DU yn cyd-fynd â’r hyn sydd ar y label	5	22	42	27
Bwyd yn cael ei gynhyrchu mewn modd cynaliadwy	5	18	44	28
Diogelwch a hylendid bwyd o’r tu allan i’r DU	4	20	43	29
Bwyd a addaswyd yn enetig (GM)	7	21	34	30
Cynhwysion ac ychwanegion mewn bwyd	4	18	44	30
Lles anifeiliaid yn y broses cynhyrchu bwyd	5	15	42	33
Fforddiadwyedd bwyd	2	7	34	55

Lawrlwytho’r siart hon

Delwedd .csv

Ffynhonnell: Bwyd a Chi 2: Cylch 7

Gofynnwyd i’r ymatebwyr nodi i ba raddau roeddent yn pryderu am nifer o faterion penodol sy’n ymwneud â bwyd. Roedd yr ymatebwyr yn fwyaf tebygol o nodi eu bod yn poeni’n fawr am fforddiadwyedd bwyd (55%). Roedd materion eraill yr oedd yr ymatebwyr yn bryderus iawn yn eu cylch yn cynnwys lles anifeiliaid yn y broses cynhyrchu bwyd (33%), cynhwysion ac ychwanegion mewn bwyd (30%), a bwyd a addaswyd yn enetig (GM) (30%) (Ffigur 6).  ^{(footnote 4)}

 
Roedd lefel y pryder am fforddiadwyedd bwyd a nodwyd yn amrywio rhwng gwahanol gategorïau o bobl yn y ffyrdd canlynol:

• Rhyw: Roedd menywod (61%) yn fwy tebygol o nodi eu bod yn poeni’n fawr am fforddiadwyedd bwyd na dynion (48%).
• Grŵp oedran: Roedd yr ymatebwyr rhwng 25 a 74 oed yn fwy tebygol o adrodd eu bod yn poeni’n fawr am fforddiadwyedd bwyd na’r rheiny rhwng 16 a 24 oed (45%) a’r rheiny 75 oed neu hŷn (37%). 
• Incwm blynyddol y cartref: Roedd yr ymatebwyr ag incwm is yn fwy tebygol o ddweud eu bod yn bryderus iawn am fforddiadwyedd bwyd o gymharu â’r ymatebwyr ag incwm uwch (er enghraifft, 61% o’r rheiny ag incwm o lai nag £19,000 o gymharu â 55% o’r rheiny ag incwm rhwng £64,000 a £95,999).
• NS-SEC: Roedd y rheiny yn y rhan fwyaf o grwpiau galwedigaethol (er enghraifft, 61% o’r rheiny mewn swyddi lled-ailadroddus ac ailadroddus) yn fwy tebygol o nodi eu bod yn poeni’n fawr am fforddiadwyedd bwyd na myfyrwyr amser llawn (44%).
• Rhanbarth (Lloegr) ^{(footnote 5)}: Roedd pryderon ynghylch fforddiadwyedd bwyd yn amrywio fesul rhanbarth yn Lloegr. Er enghraifft, roedd yr ymatebwyr a oedd yn byw yng Ngogledd-ddwyrain Lloegr (61%) a Gogledd-orllewin Lloegr (58%) yn fwy tebygol o nodi eu bod yn poeni’n fawr am fforddiadwyedd bwyd o gymharu â’r rheiny a oedd yn byw yn Nwyrain Lloegr (44%).
• Diogeledd bwyd: Roedd yr ymatebwyr â diogeledd bwyd isel iawn (79%) yn fwy tebygol o nodi eu bod yn poeni’n fawr am fforddiadwyedd bwyd na’r rheiny â diogeledd bwyd isel (66%) neu ymylol (66%). Y rheiny â diogeledd bwyd uchel oedd lleiaf tebygol o nodi eu bod yn bryderus iawn am fforddiadwyedd bwyd (45%). 
• Gorsensitifrwydd i fwyd: Roedd yr ymatebwyr ag alergedd yn unig (65%) yn fwy tebygol o nodi eu bod yn poeni’n fawr am fforddiadwyedd bwyd na’r rheiny heb orsensitifrwydd i fwyd (54%).
• Cyflwr iechyd hirdymor: Roedd yr ymatebwyr â chyflwr iechyd hirdymor (61%) yn fwy tebygol o nodi eu bod yn poeni’n fawr am fforddiadwyedd bwyd na’r rheiny heb gyflwr iechyd hirdymor (52%)**.
• Cyfrifoldeb dros goginio: Roedd yr ymatebwyr a oedd yn gyfrifol am goginio (55%) yn fwy tebygol o nodi eu bod yn poeni’n fawr am fforddiadwyedd bwyd na’r rheiny nad oedden nhw’n gyfrifol am goginio (43%).
• Cyfrifoldeb dros siopa: Roedd yr ymatebwyr a oedd yn gyfrifol am siopa (56%) yn fwy tebygol o nodi eu bod yn poeni’n fawr am fforddiadwyedd bwyd na’r rheiny nad oedden nhw’n gyfrifol am siopa (36%).