Canllawiau ar wneud cais am gynhyrchion rheoleiddiedig

Pwysig: Diwygio’r broses awdurdodi cynhyrchion rheoleiddiedig i’w rhoi ar y farchnad

Ar 1 Ebrill 2025, cafodd y broses awdurdodi cynhyrchion rheoleiddiedig i’w rhoi ar y farchnad ei diwygio gan ddeddfwriaeth sy’n cwmpasu Prydain Fawr, sy’n gwneud y canlynol:

1. dileu gofynion ar gyfer adnewyddu awdurdodiadau o bryd i’w gilydd ar gyfer ychwanegion bwyd anifeiliaid, cyflasynnau mwg a bwyd neu fwyd anifeiliaid sy’n cynnwys organebau a addaswyd yn enetig, sy’n cynnwys organebau a addaswyd yn enetig, neu sydd wedi’u cynhyrchu o organebau a addaswyd yn enetig
2. caniatáu i awdurdodiadau ddod i rym yn dilyn penderfyniad gweinidogol, ac yna cael eu cyhoeddi ar gofrestr neu restr swyddogol, yn hytrach na chael eu rhagnodi gan offeryn statudol (OS)

Diwygiwyd ein canllawiau i ystyried y newidiadau hyn. Efallai yr hoffech gael mwy o wybodaeth am y diwygiadau a sut maent yn berthnasol i fathau penodol o gynnyrch.

Cyn i chi ddechrau

Mae’n rhaid i rai cynhyrchion bwyd a bwyd anifeiliaid, a elwir yn gynhyrchion rheoleiddiedig, fynd trwy broses dadansoddi risg, ac mae’n rhaid eu hawdurdodi i’w rhoi ar y farchnad cyn y gellir eu gwerthu.

Cyn i chi ddechrau’r broses o wneud cais, bydd angen i chi ystyried a oes angen i chi wneud cais i awdurdodi cynnyrch rheoleiddiedig i’w roi ar y farchnad.  Mae'r dudalen hon yn esbonio’r gofynion o ran gwneud cais a bydd yn eich helpu i bennu a oes angen i chi wneud cais.
 
Mae angen i chi wneud cais i awdurdodi cynnyrch rheoleiddiedig os ydych yn dymuno rhoi un o’r mathau canlynol o gynhyrchion ar y farchnad ym Mhrydain Fawr. Dilynwch y dolenni i weld canllawiau penodol yr ASB ar gyfer pob math o gynnyrch (‘cyfundrefn’). Mae’r tudalennau hyn hefyd yn cynnwys dolenni i’r canllawiau a’r rheoliadau perthnasol sy’n gymwys i bob cyfundrefn:

• toddyddion echdynnu (extraction solvents)
• ychwanegion bwyd anifeiliaid
• bwyd anifeiliaid at ddefnydd maethol neilltuol (PARNUTS)
• prosesau dadwenwyno bwyd anifeiliaid
• cyflasynnau
• deunyddiau a ddaw i gysylltiad â bwyd
• ychwanegion bwyd
• ensymau bwyd
• organebau a addasir yn enetig (GMOs) fel bwyd a bwyd anifeiliaid
• bwyd wedi’i arbelydru (irradiated)
• bwydydd newydd
• cyflasynnau mwg

Yn ogystal, os ydych yn dymuno gwneud cais i awdurdodi cynnyrch canabidiol (CBD), gallwch ddod o hyd i ragor o wybodaeth yn ein canllawiau ar CBD.

Os hoffech wneud cais i awdurdodi cynnyrch a wneir drwy feithrin celloedd (CCP), gallwch ddod o hyd i ragor o wybodaeth yn ein canllawiau ar CCPs.

Awdurdodiadau presennol

Os cafodd eich cynnyrch neu eich proses ei hawdurdodi gan y Comisiwn Ewropeaidd (CE) cyn 1 Ionawr 2021 a bod y ddeddfwriaeth angenrheidiol yn gymwys, mae’r awdurdodiad hwnnw’n parhau i fod yn ddilys ym Mhrydain Fawr.

Rhoi eich cynnyrch ar y farchnad yng Ngogledd Iwerddon

Mae ymgeiswyr sy’n dymuno rhoi cynhyrchion rheoleiddiedig ar y farchnad yng Ngogledd Iwerddon yn parhau i ddilyn proses awdurdodi’r UE. Fodd bynnag, gall cynhyrchion rheoleiddiedig a awdurdodwyd ym Mhrydain Fawr hefyd gael eu rhoi ar y farchnad yng Ngogledd Iwerddon, ar yr amod eu bod yn gymwys ar gyfer Cynllun Symud Nwyddau Manwerthu Gogledd Iwerddon (NIRMS) a’u bod yn cael eu symud drwyddo. 

Y broses o wneud cais 

Unwaith y byddwch wedi cadarnhau bod y cynnyrch yr ydych am ei roi ar y farchnad yn gynnyrch rheoleiddiedig nad yw eisoes wedi’i awdurdodi ym Mhrydain Fawr, mae’n rhaid i chi adolygu’r wybodaeth ar y dudalen hon a’r canllawiau sy’n benodol i’ch cyfundrefn cyn i chi gyflwyno’ch cais. Mae hyn er mwyn sicrhau bod gennych yr holl wybodaeth ofynnol.

Mae angen yr wybodaeth hon fel y gall ein haseswyr risg bennu a yw’r cynnyrch neu’r broses yn ddiogel, ac er mwyn helpu i benderfynu a fydd y cais yn cael ei awdurdodi.

Mae’r cofrestrau o gynhyrchion rheoleiddiedig  yn rhestru’r cynhyrchion rheoleiddiedig y caniateir eu defnyddio ym Mhrydain Fawr ac yn cyfeirio at eu telerau awdurdodi.

Pwysig:  

Bydd ansawdd y goflen, a’r wybodaeth a ddarperir, yn effeithio'n sylweddol ar yr amser sydd ei angen ar gyfer asesu ac awdurdodi. Rydym yn annog ymgeiswyr i ddilyn y canllawiau a darparu’r holl wybodaeth ofynnol er mwyn sicrhau y gallwn brosesu eich cais mor effeithlon â phosib. Mae ceisiadau anghyflawn yn debygol o gael eu gohirio a/neu eu hystyried yn annilys neu eu gwrthod.

I gael trosolwg o’r broses awdurdodi, edrychwch ar ein siart llif ar y broses awdurdodi cynhyrchion rheoleiddiedig a’n siart llif ar y broses dadansoddi risg.

 

Ar gyfer y rhan fwyaf o fathau o gynhyrchion rheoleiddiedig, unwaith y bydd cynhyrchion neu brosesau wedi’u hawdurdodi, cânt eu rhestru mewn cofrestrau ar-lein, sydd hefyd yn nodi sut y gellir eu defnyddio.

Nid yw’r cofrestrau ar gyfer y sylweddau neu’r prosesau canlynol wedi’u creu eto:

• ensymau bwyd
• deunyddiau a ddaw i gysylltiad â bwyd – prosesau ailgylchedig
• deunyddiau a ddaw i gysylltiad â bwyd – deunyddiau gweithredol a deallus

Hyd nes y bydd y cofrestrau ar waith, gellir gosod y cynhyrchion hyn ar y farchnad os ydynt yn bodloni gofynion: 

• y Gyfraith Bwyd Gyffredinol
• y meini prawf cyffredinol perthnasol yn y ddeddfwriaeth ensymau bwyd a deunydd a ddaw i gysylltiad â bwyd

Sylwer: Yn gyffredinol, ni roddir awdurdodiadau ar gyfer bwydydd cyfansawdd. Mae’r gofyniad i wneud cais am awdurdodiad yn ymwneud â sylwedd penodol (er enghraifft 2’-ffycosylactos fel bwyd newydd) yn hytrach na chynnyrch cyfansawdd sy’n cynnwys cynnyrch rheoleiddiedig fel cynhwysyn (er enghraifft diod â blas sy’n cynnwys y bwyd newydd 2’-ffycosylactos). Rhaid paratoi ceisiadau am awdurdodiadau yn unol â hynny.

Y broses awdurdodi

Wrth asesu eich cais, byddwn yn ystyried cyfraith a gymathwyd a’r canllawiau a ddatblygwyd yn flaenorol gan Awdurdod Diogelwch Bwyd Ewrop (EFSA), fel yr amlinellwyd yn y canllawiau cyfundrefn-benodol.

Ar ôl i chi gyflwyno’ch cais, byddwn ni'n cynnal gwiriadau cychwynnol i sicrhau ei fod yn cynnwys yr holl wybodaeth angenrheidiol. Yna, bydd yr ASB, ynghyd â Safonau Bwyd yr Alban (FSS), yn cynnal asesiad i benderfynu a yw’r cynnyrch neu’r broses yn ddiogel i’w rhoi ar y farchnad yng Nghymru, Lloegr a’r Alban. Gallai hyn olygu asesiad risg gan un o’n Cyd-grwpiau Arbenigol a/neu Bwyllgorau Cynghori Gwyddonol ac ystyriaeth ffactorau dilys eraill (er enghraifft, risgiau i’r amgylchedd). Bydd y rhain yn cael eu cyfuno i ffurfio pecyn tystiolaeth. 

Yn seiliedig ar y dystiolaeth hon, byddwn yn ystyried dewisiadau rheoli risg posib ac yn gwneud argymhelliad i weinidogion. Bydd cyfle i wneud sylwadau ar y cais trwy gymryd rhan mewn ymgynghoriad yn ystod y broses rheoli risg a chyn i’r argymhelliad terfynol gael ei wneud. Yna bydd y gweinidogion yn penderfynu a ddylid awdurdodi’r cynnyrch i’w ddefnyddio yng Nghymru, Lloegr a’r Alban. Os penderfynir cefnogi awdurdodiad, bydd y gofrestr berthnasol yn cael ei diweddaru i adlewyrchu’r newid.

Bydd amseriad y broses dadansoddi risg lawn yn dibynnu ar ba mor gymhleth yw'r cais ac ar y math o gynnyrch.  Mae’r terfynau amser wedi’u gosod mewn deddfwriaeth ar gyfer rhai cynhyrchion.

Bydd ansawdd y goflen, a’r wybodaeth a ddarperir, yn effeithio'n sylweddol ar yr amser sydd ei angen ar gyfer asesu ac awdurdodi. Rydym yn annog ymgeiswyr i ddilyn y canllawiau a darparu’r holl wybodaeth ofynnol er mwyn sicrhau y gallwn brosesu eich cais mor effeithlon â phosib.

Ceisiadau parhaus i’r Undeb Ewropeaidd (UE) 

Os gwnaethoch gyflwyno’ch cais i’r UE cyn 1 Ionawr 2021 ac nad yw’r broses asesu wedi’i chwblhau eto, bydd angen i chi gyflwyno’ch cais i ni gan ddefnyddio ein porth ymgeisio. Cofiwch gynnwys eich rhif cwestiwn EFSA yn eich cais.

Efallai y byddwn yn ystyried barn gyhoeddedig EFSA a chanlyniad unrhyw drafodaethau rheoli risg ar ddiwedd y cyfnod pontio, ond mewn rhai achosion efallai y bydd angen i ni barhau i gynnal asesiad risg llawn ac ystyried yr opsiynau ar gyfer rheoli risg.

Sut i wneud cais

Gwneir ceisiadau trwy ein porth ar-lein, lle gallwch uwchlwytho’r holl wybodaeth ofynnol. Unwaith y byddwch wedi cyflwyno eich cais, byddwch yn cael e-bost gyda chyfeirnod eich achos a dolen ddiogel lle gallwch weld eich cais a hanes eich achos.

Cyngor cyffredinol ar gyflwyno cais

Wrth wneud cais i awdurdodi cynnyrch rheoleiddiedig, bydd yn rhaid i chi ddarparu gwybodaeth weinyddol a thechnegol, a gwybodaeth am ddiogelwch. Bydd yr wybodaeth hon yn ffurfio coflen eich cais.

Mae gofynion a strwythur y goflen yn benodol i’r gwahanol fathau o gynhyrchion. Rhaid i chi ddarllen a dilyn y canllawiau manwl ar gyfer y gyfundrefn sy’n berthnasol i’ch cynnyrch (er enghraifft, bwydydd newydd, ychwanegion bwyd) a chyflwyno’r data a’r wybodaeth ofynnol a nodir yn y canllawiau perthnasol.

Efallai y bydd yn rhaid gwneud ceisiadau o dan fwy nag un gyfundrefn ar gyfer rhai cynhyrchion newydd, yn enwedig cynhyrchion a addaswyd yn enetig.  Os gallai hyn fod yn berthnasol i’ch cynnyrch, fe’ch cynghorir yn gryf i gysylltu â ni trwy regulatedproducts@food.gov.uk cyn dechrau cais.

Mae canllawiau cyfundrefn-benodol yr ASB yn cysylltu â rhannau o’r canllawiau technegol a gynhyrchwyd gan EFSA lle maent yn dal i fod yn berthnasol.

Fel y nodir yng nghanllawiau cyfundrefn-benodol yr ASB ar drefniadau penodol, dylech ddilyn y rhannau o’r canllawiau EFSA sy’n ymwneud â datblygu coflenni yn unig (nid y broses o wneud cais).

Beth sydd ei angen ar gyfer gwneud cais 

Mae dwy ran i’r cais:

1. Gwybodaeth weinyddol 

Bydd angen i ni wybod:

• pwy sy’n gwneud cais am yr awdurdodiad
• pwy sy’n gyfrifol am y cynnyrch neu’r broses
• gyda phwy y dylem ni gysylltu os bydd gennym unrhyw gwestiynau

Bydd hi hefyd yn ddefnyddiol gwybod statws y cais yn yr UE, os yw wedi’i gyflwyno yno.

Rhaid i ymgeiswyr ddarparu eu manylion diweddaraf i’r ASB ar gyfer gohebiaeth. Gall methu â gwneud hynny olygu bod y cais neu’r ceisiadau’n cael eu hystyried yn annilys. 

2. Gwybodaeth dechnegol a diogelwch

Mae angen i’r goflen gynnwys yr holl wybodaeth y gofynnir amdani yn y canllawiau a’r rheoliadau perthnasol ar gyfer y gwahanol fathau o gynhyrchion rheoleiddiedig. Os byddwch yn methu â chyflwyno’r holl wybodaeth angenrheidiol, gall eich cais fod yn destun oedi a/neu gall gael ei wrthod neu ei ystyried yn annilys. Mae’r porth ymgeisio yn cynnwys rhestr wirio i’ch helpu i sicrhau bod eich coflen yn gyflawn pan fyddwch yn ei chyflwyno. Ni ddylech gyflwyno’ch cais oni bai bod gennych yr holl wybodaeth ategol sy’n angenrheidiol ar gyfer eich cais a’ch bod wedi uwchlwytho’r wybodaeth ar y porth ymgeisio ar-lein.

Mae angen yr wybodaeth hon arnom i ddeall mwy am y cynnyrch neu’r broses a sut y bwriedir ei defnyddio. Bydd hyn yn ein galluogi i gynnal asesiad risg trylwyr, lle bo’n briodol, i wirio a ellir defnyddio’r cynnyrch neu’r broses yn ddiogel er mwyn helpu i benderfynu a fydd y cais yn cael ei awdurdodi.

 Rhaid i chi gyflwyno’r holl ddata perthnasol, p’un a yw’r canlyniadau’n cefnogi’r cynnyrch ai peidio, i ddangos eich bod yn deall y risgiau ac wedi nodi sut y gellir eu rheoli. Dylech restru’n glir yr holl ddata a ddarparwyd ac egluro sut mae’n cefnogi’r cais.

Dylech hefyd ddweud wrthym pa wybodaeth yn y cais yr hoffech iddi gael ei chadw’n gyfrinachol, yn unol â’r meini prawf a nodir yng nghanllawiau cyfundrefn-benodol yr ASB. Dylid darparu copïau o bob cyfeiriad ynghyd â thabl cyfeiriadau, a ddylai nodi’n glir pa ffeiliau neu rannau o ffeiliau sy’n cael eu hystyried yn gyfrinachol ac y gwnaed cais diogelu data ar eu cyfer.

Rydym yn derbyn coflenni yn Gymraeg ac yn Saesneg.  Rhaid cyfieithu unrhyw ddogfennau, gan gynnwys dogfennau ategol fel atodiadau neu gyfeiriadau sydd mewn ieithoedd eraill, a darparu’r cyfieithiad hwnnw wrth gyflwyno’r cais.

Enwau ffeiliau

Dylid enwi’r ffeiliau o fewn y goflen mewn modd rhesymegol.  Mae mwy o fanylion yn y rhestrau gwirio yn y porth. Bydd hyn yn lleihau’r siawns o golli data allweddol.  Bydd yn cymryd mwy o amser i asesu coflenni nad ydynt yn nodi swyddogaeth pob ffeil yn glir.  Mae hefyd yn bwysig croesgyfeirio ffeiliau o fewn y goflen lle bo’n berthnasol a nodi gwybodaeth ategol yn glir.

Gwnewch yn siŵr nad yw enwau ffeiliau yn cynnwys y nodau arbennig canlynol:

" dyfynnod

* seren

: colon 

< arwydd llai na

> arwydd mwy na

? marc cwestiwn

/ blaen slaes

\ ôl-slaes

| bar fertigol

# hashnod

% canran 

Mathau o ffeiliau

Dim ond y mathau canlynol o ffeiliau y gallwch eu huwchlwytho:

.ab1 

.asc 

.bam 

.csv 

.doc 

.docx 

.faa 

.fast5 

.fasta 

.fastq 

.ffn 

.fna, 

.frn 

.gff 

.gff3 

.hdf5 

.odf 

.pdf 

.ppt 

.pptx 

.r 

.sam 

.sas 

.tsv 

.txt 

.xls 

.xlsx 

.aln 

.bai 

.fa 

.fo 

.fq 

.gbk 

Ni fydd unrhyw fath arall o ffeil, gan gynnwys ffeiliau zip (na chaniateir am resymau diogelwch) na delweddau, yn cael eu cadw. Dim ond ffeiliau sengl o’r un ffolder ffynhonnell y gellir eu lanlwytho ar y tro.

Uwchlwytho ffeiliau mawr

Ni chewch uwchlwytho mwy na 100 o ffeiliau ar y tro. Gyda’i gilydd, ni ddylent fod yn fwy na 200MB. Does dim rhaid uwchlwytho popeth ar unwaith – gallwch wneud fesul tipyn.

Os oes gennych wybodaeth nad yw ar gael yn unrhyw un o’r fformatau neu meintiau hyn, cysylltwch â ni drwy regulatedproducts@food.gov.uk i drafod opsiynau. Argymhellir hyn yn arbennig ar gyfer y rheiny sy’n gwneud cais ar gyfer cynhyrchion GM cyn iddynt uwchlwytho eu ffeiliau.

Cyngor ar ddarparu cais dilys 

Ni fydd y pwyntiau isod yn berthnasol i bob cyfundrefn, ond maent yn rhoi rhywfaint o gyngor cyffredinol:

• darperir canllawiau manwl yn nogfennau canllaw’r ASB sy’n cysylltu, lle bo’n briodol, â chanllawiau perthnasol EFSA.  Dylai ymgeiswyr gyfeirio bob amser at y canllawiau cyfundrefn-benodol i gael eglurhad, gan fod canllawiau perthnasol yn cael eu hadolygu yn ôl yr angen i gynnal safonau priodol a chefnogi coflenni o ansawdd uchel.
• dylech esbonio’n glir ddiben y cynnyrch, y defnydd a fwriedir a’i gyfansoddiad. Rhaid i chi ddarparu tystiolaeth o gyfansoddiad y cynnyrch a nodi sut rydych yn gwybod am ddilysrwydd y cynnyrch. Er enghraifft, efallai y bydd angen rhoi’r enw cemegol neu’r enw gwyddonol (Lladin), yn dibynnu ar y gyfundrefn
• dylid cynnwys yr holl wybodaeth dechnegol angenrheidiol pan fyddwch yn cyflwyno’ch cais, fel yr amlinellir yn y canllawiau cyfundrefn-benodol.  Er enghraifft, mae angen dogfennau dilysu a/neu achredu priodol ar gyfer dulliau dadansoddi ar gyfer pob cyfundrefn wahanol, a dylid eu cynnwys wrth gyflwyno ceisiadau
• rydym yn cynghori dilyn y penawdau a’r is-benawdau a roddir yng nghanllawiau perthnasol EFSA, er mwyn cynorthwyo’r gwaith dilysu.  Rhaid i bob adran gael ei chwblhau gan yr ymgeisydd i gael ei hystyried yn ffeil ddilys.  Os nad yw adran a roddir yn y canllawiau yn briodol ar gyfer y cynnyrch, dylai’r ffeil gynnwys cyfiawnhad rhesymegol ynghylch pam (er enghraifft, hanes o’i ddefnydd).  
• dylai’r goflen dechnegol esbonio sut mae’r cynnyrch yn bodloni’r meini prawf a nodir yn y rheoliad a’r canllawiau perthnasol. Dylech restru’n glir yr holl ddata a ddarparwyd ac egluro sut mae’n cefnogi’r farn bod y cynnyrch yn ddiogel. Rhaid i chi gyflwyno’r holl ddata perthnasol, p’un a yw’r canlyniadau’n cefnogi’r cynnyrch ai peidio
• ar gyfer y rhan fwyaf o lwybrau ymgeisio, dylai’r coflenni gynnwys eich asesiad o risg y cynnyrch, gyda digon o wybodaeth i ddilysu’r asesiad hwn.  Diben yr asesiad yw dangos eich bod yn deall y risgiau a’ch bod wedi nodi sut y gellir eu rheoli
• lle bo’n briodol, dylid cynnwys gwybodaeth am berthnasedd a chryfder y data, yn ogystal â’r dulliau profi. Dylid hefyd gynnwys dehongliad o’r data.  Os yw’n berthnasol, dylid ystyried amrywioldeb y cynnyrch wrth ddewis pa sypiau i’w profi. Rhaid i geisiadau sydd â llai o sypiau nag a nodir yn y canllawiau roi cyfiawnhad llawn dros y nifer a gyflwynir.    
• ar gyfer coflenni lle mae angen llenwi adran gynhyrchu, mae Cynllun Dadansoddi Peryglon a Phwyntiau Rheoli Critigol (HACCP) yn ddefnyddiol. Dylai’r wybodaeth yn yr adran hon nodi a oes risgiau newydd wedi’u cyflwyno yn ystod y broses gynhyrchu ac i ba raddau y caiff peryglon cyfredol y deunydd cychwynnol eu rheoli. Os bydd profion dadansoddi’r cynnyrch yn cefnogi’r asesiad o ba mor effeithiol yw cam penodol, dylid nodi hyn yn glir.

Ceisiadau am ragor o wybodaeth

Pwysigrwydd cyflwyno cais cyflawn

Wrth gyflwyno ceisiadau, mae’r ASB yn disgwyl iddynt fod yn gyflawn ac iddynt gynnwys yr holl wybodaeth angenrheidiol. Mae angen yr wybodaeth hon fel y gall ein haseswyr risg bennu a yw’r cynnyrch neu’r broses yn ddiogel, ac er mwyn helpu i benderfynu a fydd y cais yn cael ei awdurdodi.

Os oes gennych unrhyw gwestiynau am ofynion ceisiadau, gallwch gysylltu â ni yn regulatedproducts@food.gov.uk.  

Mae ceisiadau anghyflawn yn debygol o gael eu gohirio a/neu eu hystyried yn annilys. Os yw’r wybodaeth mewn ceisiadau yn anghyflawn neu ar goll, yna bydd cyfle cyfyngedig i lenwi’r bylchau, o fewn rheswm ac yn ôl disgresiwn yr ASB. 

Isod, ceir gwybodaeth a chyngor ar ddisgwyliadau’r ASB pan fyddwn yn gofyn am wybodaeth, a allai fod yn wahanol i reoleiddwyr eraill.

Ymateb i geisiadau am wybodaeth yn ystod y cam dilysu

Unwaith y byddwch wedi cyflwyno eich cais, bydd yn mynd trwy gyfres o wiriadau cyn y gellir ei ddilysu. Er mwyn llwyddo yn y cam dilysu, ni ddylai fod angen ychwanegiadau sylweddol.

Os canfyddir bod gwybodaeth ar goll neu’n anghyflawn, mae’n bosib y byddwn yn anfon cais am fwy o wybodaeth, a byddwn yn oedi’r cais nes bydd yr wybodaeth yn dod i law. Bydd pob cais yn egluro pa wybodaeth y mae'n rhaid ei darparu. Bydd hefyd yn nodi'n glir y dyddiad cau pryd y bydd yn rhaid i’r cais ddod i law. Os bydd angen mwy o amser arnoch, dylech ymateb cyn gynted â phosib o fewn y cyfnod penodedig i gynnig dyddiad cau arall, gan esbonio pam. Wedyn, byddwn yn ystyried eich cais. 

Dylai eich ymatebion i’n ceisiadau am wybodaeth fod yn drylwyr, gan roi sylw i bob pwynt yr ydym wedi’i godi. Dylech chi roi esboniad rhesymol os na fydd eich atebion yn bodloni’r gofynion hynny.  Cofiwch y pwyntiau canlynol: 

• Ni fyddwn yn gofyn yr un cwestiwn ddwywaith, felly ni ddylech ddisgwyl i ni anfon ceisiadau dilynol i fynd ar drywydd gwybodaeth yr ydym eisoes wedi gofyn amdani os yw’n dal i fod ar goll ar ôl y dyddiad cau. 
• Efallai y byddwn yn gofyn i chi egluro'r wybodaeth yr ydych yn ei chyflwyno i ni. 

Os daw’r dyddiad cau ar gyfer cyflwyno’r wybodaeth i ben ac nad ydych wedi anfon yr wybodaeth rydym wedi gofyn amdani, yna bydd y penderfyniad ar ddilysu yn seiliedig ar yr wybodaeth yr ydych eisoes wedi’i rhoi i ni.  

Ymateb i geisiadau am wybodaeth yn ystod y cam asesu

Os bernir bod eich cais yn ddilys a’i fod yn symud i’r cam asesu, efallai y gofynnir i chi ddarparu gwybodaeth ychwanegol. Dyma wybodaeth y mae’r tîm arbenigol perthnasol neu’r pwyllgor cynghori gwyddonol yn ei hystyried yn angenrheidiol i gefnogi’r asesiad. Byddwn yn oedi’r cais nes i’r wybodaeth ddod i law.

Bydd pob cais yn nodi'r wybodaeth y mae'n rhaid ei darparu a'r dyddiad cau ar gyfer gwneud hynny.  Os bydd angen mwy o amser arnoch, bydd cyfle i chi gynnig dyddiad cau arall. Fodd bynnag, mae’n annhebygol y bydd amserlenni hirfaith ar gyfer cynnal astudiaethau ychwanegol yn cael eu derbyn os yw’n rhesymol disgwyl y dylai’r wybodaeth fod wedi’i chyflwyno gyda’r cais. Er mwyn osgoi'r sefyllfa hon, dylai ymgeiswyr ddarllen y canllawiau cyfundrefnol perthnasol ar ein gwefan yn drylwyr cyn cyflwyno.

Rhaid i chi ddarparu’r wybodaeth y gofynnir amdani erbyn y dyddiad cau. Mae ymatebion hwyr neu anghyflawn yn debygol o arwain at orfod asesu eich cais ar sail yr wybodaeth sydd ar gael.

Ystyriaethau pellach

Dylai ymgeiswyr ddarllen y cais am wybodaeth i sicrhau eu bod yn deall yn iawn yr hyn sy'n cael ei ofyn. Os oes gennych unrhyw gwestiynau ar ôl darllen y canllawiau perthnasol, dylid eu codi cyn gynted â phosibl. Os oes unrhyw faterion technegol cymhleth na ellir eu datrys trwy gyfathrebu ysgrifenedig, mewn amgylchiadau eithriadol efallai y byddwn yn trefnu cyfarfod, ar yr amod bod y materion wedi'u mynegi'n glir yn ysgrifenedig yn gyntaf.

Fel y nodwyd uchod, disgwylir i ymgeiswyr gyflwyno ceisiadau cyflawn, a bydd ceisiadau am wybodaeth yn cael eu cyhoeddi yn ôl disgresiwn yr ASB. Mae penderfyniadau ynghylch yr amserlenni ar gyfer ymateb i geisiadau am wybodaeth, yn ogystal â digonolrwydd a chyflawnder ymatebion, hefyd yn parhau i fod yn ôl disgresiwn yr ASB.

Byddwn yn ystyried amgylchiadau fesul achos, gan gynnwys i ba raddau y cydymffurfiwyd â chanllawiau’r ASB, a byddwn yn ymdrechu i sicrhau cysondeb a thegwch i ymgeiswyr, wrth hefyd hwyluso proses awdurdodi amserol ac effeithlon.

Gwneud cais am gynnyrch rheoleiddiedig

Gallwch nawr ddefnyddio ein porth ymgeisio ar-lein i wneud cais am gynnyrch rheoleiddiedig.

Cael help

Os oes gennych unrhyw gwestiynau am awdurdodi cynhyrchion rheoleiddiedig, neu gwestiynau cyffredinol o ran a yw cynnyrch wedi’i ganiatáu yn y DU, a hynny ar ôl edrych ar y cofrestrau, cysylltwch â ni drwy regulatedproducts@food.gov.uk cyn dechrau gwneud cais.

Os oes gennych unrhyw ymholiadau eraill, gan gynnwys ymholiadau ar fewnforion a chofrestru busnes bwyd, darllenwch ein canllawiau i fusnesau a chyflwynwch ymholiad ar-lein os oes angen rhagor o gymorth arnoch.

Darparu gwybodaeth am gynhyrchion rheoleiddiedig awdurdodedig

Os oes angen i chi gysylltu â’r ASB ynglŷn ag awdurdodiad sy’n bodoli eisoes, anfonwch e-bost atom yn regulatedproducts@food.gov.uk.  Dylech ddefnyddio’r llwybr hwn i roi gwybod i ni am unrhyw bryderon diogelwch newydd, neu rai sy’n datblygu, am gynnyrch awdurdodedig, er enghraifft os byddwch yn dod yn ymwybodol o unrhyw amheuaeth newydd ar asesiad diogelwch blaenorol.

Yn ogystal, rhaid i chi (lle bo angen) ddefnyddio’r llwybr hwn i anfon adroddiadau monitro ôl-farchnad, adroddiadau monitro amgylcheddol ôl-farchnad, diweddariadau neu newidiadau i ddulliau dadansoddi neu ganfod, ac unrhyw wybodaeth arall sy’n ymwneud ag awdurdodiad presennol. 

Wrth anfon e-bost, dylech sôn am yr awdurdodiad neu'r cynnyrch rydych chi'n cyfeirio ato, pa fath o wybodaeth rydych chi'n ei darparu, a chynnwys y rhif RP os yw'n berthnasol.    

Mae’n ofynnol yn ôl y gyfraith i fusnesau adrodd i’r ASB/FSS os oes ganddynt le i gredu y gallai rhoi’r bwyd neu’r bwyd anifeiliaid ar y farchnad wneud niwed i ddefnyddwyr.

Rhaid i chi roi gwybod i'r ASB yng Nghymru, Lloegr neu Ogledd Iwerddon am unrhyw ddigwyddiadau diogelwch bwyd. Os ydych yn yr Alban, neu os yw’r digwyddiad yn ymwneud â busnes yn yr Alban, rhowch wybod am y digwyddiad i FSS.