Argymhelliad yr Asiantaeth Safonau Bwyd i asesu’r system rheoli diogelwch bwyd yng Ngwlad Pwyl

Cefndir

Yn ystod yr ychydig flynyddoedd diwethaf, mae’r DU wedi gweld cynnydd yn nifer yr hysbysiadau gan System Rhybuddio Cyflym yr UE ar gyfer Bwyd a Bwyd Anifeiliaid mewn perthynas â Salmonela a ganfuwyd mewn cig dofednod a chynhyrchion cig dofednod Pwylaidd a oedd wedi’u hallforio i’r DU. Mae’r hysbysiadau hyn yn mynnu bod yn rhaid i weithredwyr busnesau bwyd ac awdurdodau bwyd yn y DU gynnal ymyriadau diogelwch bwyd fel tynnu a/neu alw cynhyrchion yn ôl, sy’n faich sylweddol ar yr awdurdodau hynny a’r diwydiant bwyd.

Drwy ymchwiliadau, cyfarfodydd ag awdurdodau Pwylaidd, a gwaith gyda’r diwydiant, nodwyd pryderon ynghylch gallu Gwlad Pwyl i ganfod Salmonela mewn cig dofednod a chynhyrchion cig dofednod, ac, ar ôl ei ganfod, reoli’r pathogen yn briodol.

Cyflwynwyd camau unioni a gwell rheolaethau gan awdurdodau Gwlad Pwyl i sicrhau na fyddai modd allforio cynhyrchion dofednod anniogel i’r DU. Mae tystiolaeth ddiweddar yn dangos bod y sefyllfa’n gwella, er nad yw wedi’i datrys yn llawn.

Argymhelliad yr ASB – mis Ebrill 2023

Mae’r ASB yn argymell archwiliad i asesu’r system rheoli diogelwch bwyd yng Ngwlad Pwyl a gwirio’r trefniadau ar gyfer gweithredu camau unioni hanesyddol ac arfaethedig. Diben hyn fydd sicrhau bod digon o fesurau diogelu iechyd ar waith ar gyfer defnyddwyr yn y DU mewn perthynas â mewnforion cig dofednod a chynhyrchion cig dofednod sy’n tarddu o Wlad Pwyl.