Newidiadau Arfaethedig i Strwythur Deddfwriaeth Ychwanegion Bwyd yr UE (Cymru)

Cyn bo hir bydd newidiadau’n cael eu gwneud i ddeddfwriaeth ychwanegion bwyd yr UE a fydd yn ei gwneud yn haws nodi pa ychwanegion a ganiateir mewn bwyd.

Mae Erthygl 30, Rheoliad 1333/2008 ar ychwanegion bwyd yn gofyn i’r ychwanegion a ganiateir mewn bwyd a’r amodau defnyddio gael eu trosglwyddo o’r Atodiadau yng Nghyfarwyddebau 95/2/EC (ychwanegion amrywiol), 94/35/EC (melysyddion) a 94/36/EC (lliwiau) i Atodiad II Rheoliad 1333/2008. Yn ogystal, noda Erthygl 4.3 y rheoliad y caiff yr ychwanegion eu rhestru ar sail y categori bwyd y gellir eu hychwanegu ato. I’r perwyl hwn, mae’r Comisiwn Ewropeaidd wedi datblygu System Categoreiddio Bwyd hierarchaidd, yn seiliedig ar Safon Gyffredinol Codex ar Ychwanegion Bwyd, ond wedi’i haddasu ar gyfer anghenion rhanddeiliaid Ewropeaidd.

Mae’r Comisiwn Ewropeaidd wedi creu’r tablau draft atodedig (ar ffurf llyfrau gwaith Excel), sy’n cwmpasu 16 o wahanol gategorïau bwyd wedi’u rhannu’n nifer o is-gategorïau, y bwriedir iddynt gynnwys y System Categoreiddio Bwyd. Caiff ychwanegion y caniateir iddynt gael eu defnyddio eu rhestru yn erbyn pob is-gategori, ynghyd ag amodau defnyddio. Mae’r tablau, a luniwyd gan y Comisiwn Ewropeaidd, yn ystyried sylwadau gan Aelod-wladwriaethau’r UE a’r sylwadau a wnaed yn ystod ymgynghoriad dwyochrog gyda rhanddeiliaid. Mae dogfen sy’n rhoi cyflwyniad i’r System Categoreiddio bwyd wedi cael ei drafftio hefyd.

Ni fwriedir rhoi caniatâd i ychwanegion gael eu defnyddio at ddibenion newydd neu at ddibenion ychwanegol yn sgîl yr ymarfer hwn.

Prif gynnig:

• Newid strwythur deddfwriaeth ychwanegion bwyd y DU er mwyn ei symleiddio fel y nodir yn y tablau drafft atodedig.

Mae’r Comisiwn Ewropeaidd eisoes wedi ymgynghori’n anffurfiol gyda chymdeithasau masnach y diwydiant a chydag Aelod-wladwriaethau’r UE ar yr ymarfer trosglwyddo arfaethedig ac mae’r Asiantaeth Safonau Bwyd wedi ysgrifennu at y sectorau bwyd perthnasol yn gofyn am eu sylwadau.

Er mwyn gwirio cywirdeb ymhellach, gofynnir am sylwadau yn awr gan bob rhanddeiliaid yn y DU ar unrhyw gamgymeriadau neu ychwanegion a ganiateir sydd wedi eu hepgor o’r rhestr. Yn ogystal croesewir sylwadau ar ddisgrifyddion y categorïau bwyd sydd ar yr ail daflen waith ym mhob llyfr gwaith. Mae’r Comisiwn yn bwriadu i’r disgrifyddion hyn fod yn rhai dangosol/cynghorol yn hytrach na bod yn gyfreithiol rwymol. Gwerthfawrogir sylwadau ar y ddogfen ddrafft sy’n rhoi cyflwyniad i’r System Categoreiddio Bwyd hefyd.

Er cyfleustra, cliciwch yma i weld fersiynau o’r tair Cyfarwyddeb a Rheoliad 1333/2008.

Atodir amserlen ar gyfer cwblhau gwaith ar y System Categoreiddio Bwyd yn Atodiad C er gwybodaeth. Fel y gwelwch, bwriedir cynnal trafodaethau mewn cyfarfodydd o’r Gweithgor ym Mrwsel fis Mehefin, ac o bosibl ym mis Gorffennaf a Medi ar y gwaith hwn. Byddem yn gwerthfawrogi derbyn sylwadau cyn gynted â phosibl er mwyn eu bwydo i drafodaethau parhaus.

Mae angen i ymatebion ddod i law erbyn dydd Gwener 27 Awst. Noder, yn eich ymateb, p’un a ydych yn ymateb ar ran sefydliad/cwmni (yn cynnwys manylion unrhyw randdeiliad y mae eich sefydliad yn eu cynrychioli).

Paratowyd yr ymgynghoriad hwn yn unol â Chod Ymarfer Swyddfa'r Cabinet ar Ymgynghori Ysgrifenedig. Mae Maen Prawf 6 Cod Ymarfer Swyddfa'r Cabinet yn datgan bod yn rhaid i ymgynghoriad ddilyn arferion gorau o safbwynt gwell rheoleiddio, sy'n cynnwys cynnal Asesiad Effaith Reoleiddiol.

Hoffem gael eich sylwadau ar yr ymgynghoriad hwn ac adborth cyffredinol ar y pecyn ymgynghori a'r broses ymgynghori gyffredinol. Os hoffech ein helpu i wella ansawdd ymgynghoriadau'r dyfodol, mae croeso i chi roi eich barn trwy ddefnyddio holiadur adborth yr ymgynghoriad.

Holiadur Adborth i'r Ymgynghoriad (Word)

Holiadur Adborth i'r Ymgynghoriad (pdf)

Yn unol ag egwyddor yr ASB o weithredu'n agored, bydd ein Canolfan Wybodaeth yn Aviation House yn cadw copi o'r ymgynghoriad cyflawn. Bydd yr ASB yn cyhoeddi crynodeb o'r ymatebion hefyd, a allai gynnwys data personol, fel eich enw a'ch cyfeiriad llawn. Dim ond os ceir ceisiadau i weld yr ymatebion cyflawn i’r ymgynghoriad y bydd unrhyw ddata personol arall yn cael ei ddatgelu. Os nad ydych chi am i ni ryddhau'r wybodaeth hon, dylech lenwi'r Ffurflen Cyhoeddi Data Personol a'i dychwelyd atom. Nid yw dychwelyd y ffurflen hon yn golygu y byddwn yn trin eich ymateb i'r ymgynghoriad yn gyfrinachol, dim ond eich data personol.

Cyhoeddi data personol (Word)

Cyhoeddi data personol (pdf)

Rydym yn bwriadu cyhoeddi crynodeb o'r ymatebion i'r ymgynghoriad o fewn tri mis iddo ddod i ben a darparu dolen ato o'r dudalen hon.

Os nad yw'r crynodeb yn ymddangos ar ôl tri mis, cysylltwch â'r sawl a oedd yn gyfrifol am yr ymgynghoriad gwreiddiol. Fel arall, cysylltwch â Cydgysylltydd Ymgynghoriadau'r ASB
E-bost: consultationcoordinator@foodstandards.gsi.gov.uk