Bydd hylendid da yn hwb i’th fusnes

Monday 25 January 2010

Heddiw, mae’r Asiantaeth Safonau Bwyd yn lansio ymgyrch ledled y DU gyfan, i godi ymwybyddiaeth ymhlith busnesau bwyd am yr adnoddau sydd ar gael gan yr Asiantaeth i helpu busnesau i gydymffurfio â chyfraith hylendid bwyd.

Mae’r adnoddau o dan sylw yn cynnwys Bwyd mwy diogel, busnes gwell (pecynnau i’w defnyddio yng Nghymru a Lloegr), CookSafe a RetailSafe (i’w defnyddio yn yr Alban), a Safe Catering (i’w ddefnyddio yng Ngogledd Iwerddon). Mae’r adnoddau hyn yn cynnig dulliau arloesol ac ymarferol o reoli diogelwch bwyd.

Mae’r ymgyrch yn cynnwys posteri, sydd ar gael drwy’r dolenni isod, hysbysebion radio, ac ymdrechion hyrwyddo ar-lein. Rhwng heddiw a dydd Llun 1 Mawrth 2010, bydd yr ymgyrch yn targedu busnesau arlwyo sy’n cyflenwi bwyd yn uniongyrchol i ddefnyddwyr – megis bwytai, siopau tecawê a chaffis.

Meddai Rob Wilkins o Dîm Gorfodi Cyffredinol Asiantaeth Safonau Bwyd Cymru: ‘Diben yr ymgyrch hon yw helpu i gefnogi’r gwaith pwysig y mae awdurdodau lleol yn ei wneud i sicrhau bod busnesau bwyd yn cydymffurfio â chyfraith bwyd. Mae hefyd yn rhoi cyfle i fusnesau gael sgôr uwch pan fydd cynllun cenedlaethol ‘Scores on the Doors’ yn cael ei gyflwyno yn ddiweddarach eleni yng Nghymru, Lloegr a Gogledd Iwerddon a phan fydd y Cynllun Gwybodaeth am Hylendid Bwyd yn cael ei gyflwyno yn yr Alban.