Y diweddaraf am y Cynllun Sgorio Hylendid Bwyd

Mae disgwyl y bydd y cynlluniau yn cael eu lansio yn lleol yn yr hydref. Mae pob un o’r 22 o awdurdodau lleol yng Nghymru yn bwriadu gweithredu’r cynllun o 1 Hydref. Yn Lloegr, mae’r rhai a fabwysiadodd y cynllun yn gynnar yn bwriadu lansio’r cynllun yn rhanbarthau’r De-orllewin, y Dwyrain a’r De-ddwyrain.

Meddai Catriona Stewart, pennaeth y Tîm Sgorio Hylendid Bwyd ‘Mae’n gyfnod cyffrous i’r cynllun gan fod pethau’n dechrau’n symud yn gyflym. Rydym ni’n hynod falch o weld brwdfrydedd y rhai a fabwysiadodd y cynllun yn gynnar wrth roi’r cynllun ar waith ac rydym yn rhannu eu hymrwymiad i sicrhau y bydd yn llwyddiant. Rydym yn hapus iawn gydag edrychiad a theimlad y brandio newydd gan ei fod yn ei gwneud yn hawdd i ddefnyddwyr gymryd cip sydyn ar beth yw sgôr hylendid y sefydliad.’

Yn unol â chanfyddiadau ymchwil annibynnol gyda defnyddwyr, teitl swyddogol y cynllun cenedlaethol yw’r ‘Cynllun Sgorio Hylendid Bwyd’ a bydd sgoriau yn cael eu harddangos ar raddfa syml o rifau. Bydd y dyluniadau brandio newydd sbon sy’n cael eu cyhoeddi heddiw yn ei gwneud yn hawdd i ddefnyddwyr ddeall a defnyddio’r sgoriau hylendid bwyd.

Mae’r Asiantaeth hefyd wedi cyhoeddi bod y system TG – gan gynnwys y teclyn chwilio ar-lein i ddefnyddwyr a’r system lanlwytho data ar gyfer awdurdodau lleol – yn cael ei brofi ar hyn o bryd. Bydd y teclyn chwilio yn galluogi defnyddwyr i chwilio am sgoriau hylendid busnesau mewn ardaloedd lle mae’r cynllun ar waith.

Mae disgwyl i’r systemau, a fydd yn cael eu profi gan ddefnyddwyr ac awdurdodau lleol, fod yn fyw erbyn canol mis Medi.

Mae’r llythyr llawn i ddiweddaru awdurdodau lleol a’r brandio CSHB ar gael drwy’r dolenni isod.