Cyhoeddi adroddiad yn dilyn Ymchwiliad Cyhoeddus E.coli

Thursday 19 March 2009

Mae adroddiad yr Ymchwiliad Cyhoeddus E.coli, a sefydlwyd i ymchwilio i’r achos E.coli 0157 yng Nghymru yn 2005, wedi’i gyhoeddi heddiw.

Hwn oedd yr achos mwyaf erioed o E.coli O157 yng Nghymru, a'r ail achos fwyaf ym Mhrydain. Effeithiodd ar dros 150 o bobl, y rhan fwyaf ohonynt yn blant mewn 44 o ysgolion ar draws pedwar awdurdod lleol. Cafodd tri deg un o bobl driniaeth ysbyty a bu farw bachgen bach pum mlwydd oed.

Mewn datganiad heddiw, meddai’r Asiantaeth Safonau Bwyd (ASB): ‘Mae adroddiad yr Ymchwiliad Cyhoeddus yn ddogfen gynhwysfawr a bydd yr Asiantaeth yn mynd ati i’w hadolygu’n fanwl. Bydd y mater hwn yn cael ei drafod ymhellach yng nghyfarfod agored Bwrdd yr ASB fis Ebrill.’

Sefydlodd Cynulliad Cenedlaethol Cymru yr Ymchwiliad Cyhoeddus i ymchwilio i’r hyn a achosodd y digwyddiad. Dyma oedd ei gylch gorchwyl: ‘Cynnal ymchwiliad i’r amgylchiadau a arweiniodd at yr Achos E.coli 0157 yn ne Cymru ym mis Medi 2005 ac i’r ffordd yr ymdriniwyd â’r Achos; ac ystyried y goblygiadau ar gyfer y dyfodol a gwneud argymhellion yn unol â hynny.’

Yn y datganiad, ychwanega’r Asiantaeth: ‘Iechyd y cyhoedd yw prif flaenoriaeth yr Asiantaeth Safonau Bwyd (ASB) a’r Gwasanaeth Hylendid Cig (MHS). Sefydlwyd yr ASB yn y flwyddyn 2000 i ddiogelu defnyddwyr ac rydym yn croesawu unrhyw gamau a gyflwynir i’n cynorthwyo gyda’r nod hwn. Ers 2000, mae nifer yr achosion o salwch a gludir gan fwyd wedi gostwng o bron i 20%. Mae ymrwymiad yr ASB i’r gwaith hwn yn parhau.

‘Roedd yr achos E.coli a fu yng Nghymru yn 2005 yn ddigwyddiad difrifol ond anarferol, ac mae adroddiad yr Ymchwiliad Cyhoeddus yn werthfawr wrth ein galluogi i ddeall y gyfres o ddigwyddiadau a arweiniodd at yr achosion o E.coli a gafwyd.

‘Mae gan bawb sy'n ymwneud â chynhyrchu a dosbarthu bwyd ran i’w chwarae wrth sicrhau bod bwyd yn ddiogel – o’r cynhyrchwyr bwyd i bobl yn eu cartrefi eu hunain. Pan fydd achosion prin fel yr un dan sylw yn digwydd, rhaid i ni fynd ati i ddysgu gwersi ac atgyfnerthu ein systemau ymhellach.’

Mae’r adroddiad llawn, yn ogystal â chrynodeb gweithredol yr ymchwiliad, ar gael ar wefan yr ymchwiliad drwy’r ddolen isod.