Yr arolwg diweddaraf o agweddau defnyddwyr – bwyta’n iach yn bwysig yng nghymru

Sunday 24 February 2008

Heddiw, mae’r Asiantaeth Safonau Bwyd yn cyhoeddi’r wythfed arolwg blynyddol o Agweddau Defnyddwyr¹ ar gyfer Cymru. Mae’r canfyddiadau’n dangos bod defnyddwyr yn parhau i gymryd llawer o ddiddordeb mewn bwyta’n iach.

Mae’r prif bwyntiau sy’n ymwneud â deiet a maethiad yn cynnwys:

• Honnodd naw o bob deg ymatebwr fod bwyta’n iach yn bwysig iddynt, ac roedd 88% hefyd yn credu nad yw byw ar arian bach yn rhwystr i fwyta’n iach. Roedd canran fawr (83%) hefyd yn cytuno y dylai rhieni fod yn gadarn gyda’u plant a’u gorfodi i fwyta’n iach
• Bellach mae ychydig dros dri chwarter (76%) y defnyddwyr yn gwybod y dylent fwyta o leiaf pum dogn o lysiau a ffrwythau amrywiol bob dydd². Roedd 50%, sydd hefyd yn well na’r llynedd, yn honni eu bod yn gweithredu ar hyn drwy fwyta o leiaf ‘5 y dydd’³
• Mae labeli bwyd yn dal i fod yn bwysig i siopwyr yng Nghymru, gyda 71% yn edrych ar yr wybodaeth am faeth wrth brynu cynhyrchion am y tro cyntaf. Mae’r prif bethau y mae defnyddwyr yn edrych arnynt wrth ddarllen labelu bwyd yn parhau i fod yr un peth, sef maint y braster, yr halen, y siwgr, y braster dirlawn a’r ychwanegion. Maint y braster a’r halen yw’r wybodaeth am faeth y maent yn chwilio amdani’n amlaf ar labeli4 . Fodd bynnag, mae yna amrywiadau bach y naill ffordd a’r llall mewn rhai o'r meysydd hyn. Mae canran y bobl sy’n edrych am fanylion am gynnwys braster wedi gostwng yn sylweddol ers 2006 - i lawr i 45% o 47%, a braster dirlawn i lawr i 21% o 24%. Mae canran y bobl sy’n chwilio am wybodaeth am lefel y siwgr neu’r ychwanegion sy’n bresennol wedi aros yr un peth. Bu cynnydd yng nghanran y bobl sy’n edrych ar faint o halen sydd mewn cynhyrchion, o 39% yn 2006 i 45% yn 2007
• Mae’r astudiaeth yn dangos bod dryswch o hyd yng Nghymru ynglŷn ag ystyr y dyddiad ‘defnyddio erbyn’ ar gyfer bwyd. Roedd llai o’r ymatebwyr (i lawr i 54% o 60% yn 2006) yn dweud yn gywir y byddai’n ddiogel bwyta bwyd hyd at y dyddiad hwn, ond na ddylid ei fwyta ar ôl y dyddiad. Hefyd roedd mwy o’r ymatebwyr yn dweud ar gam y byddai ansawdd y bwyd ar ei orau cyn y dyddiad hwn

Dywedodd Steve Wearne, Cyfarwyddwr Asiantaeth Safonau Bwyd Cymru:

'Mae’r arolwg diweddaraf hwn yn galonogol gan ei fod yn dangos bod y rhan fwyaf o bobl yn sylweddoli pa mor bwysig yw bwyta’n iach, a bod llawer hefyd yn gwybod eu pethau wrth edrych ar labeli⁴. Fodd bynnag, ymddengys fod yna lai o bryder ynglŷn â maint y braster a’r braster dirlawn yn ein bwyd. Mae hyn yn dangos pa mor bwysig yw hi i’r Asiantaeth barhau i godi ymwybyddiaeth am ddeiet iachach a darparu gwybodaeth a chyngor clir wedi’u cefnogi gan dystiolaeth wyddonol.'

Roedd yr arolwg hefyd yn edrych ar agweddau at faterion sy’n ymwneud â diogelwch bwyd. Mae defnyddwyr yng Nghymru yn dal i bryderu am y materion hyn.

Hefyd mae’r arolwg yn mesur ymwybyddiaeth o’r Asiantaeth a’i rôl o ran darparu cyngor clir i ddefnyddwyr. Dyma rai o’r prif ffigurau:

• Yng Nghymru mae ymwybyddiaeth o’r Asiantaeth ymysg defnyddwyr wedi sefydlogi, gyda ffigur uchaf cyson o 84%. Mae ymddiriedaeth yn yr Asiantaeth wedi amrywio ers 2003 ac ar hyn o bryd 51% yw’r ffigur, sy’n uwch na’r ffigur pan ofynnwyd y cwestiwn hwn am y tro cyntaf yn 2001, sef 38%
• Roedd mwy nag un allan o bob pump yn nodi’r Asiantaeth fel ffynhonnell cyngor ar fwyta’n iach