Cofrestru eich busnes bwyd

Mae’n rhaid i’r rhan fwyaf o fusnesau bwyd gofrestru gan gynnwys busnesau arlwyo sy’n gweithio o’r cartref a safleoedd symudol neu dros dro er enghraifft stondinau a faniau. Os ydych chi’n defnyddio dau safle neu fwy, bydd gofyn i chi gofrestru pob un ohonynt.

Os caiff safle arlwyo ei ddefnyddio gan fwy nag un busnes arlwyo (er enghraifft neuadd bentref neu ganolfan gynadledda), y sawl sy’n gyfrifol am adael i’r gweithgareddau hyn ddigwydd yno sy’n gyfrifol am gofrestru’r safle.

Mae cofrestru’n syml. Mae modd lawrlwytho ffurflen gofrestru o wefan ambell awdurdod lleol gan ei llenwi’n electronig a’i hanfon drwy gyfrwng e-bost, ffacs neu’r post at y tîm bwyd yn adran iechyd yr amgylchedd eich awdurdod lleol. Mae awdurdodau lleol eraill yn cynnig cyfle i gofrestru ar-lein lle cewch lenwi a chyflwyno ffurflen ar-lein.

Cysylltwch â’ch awdurdod lleol er mwyn gwybod sut i gofrestru. Er mwyn dod o hyd i fanylion cyswllt eich awdurdod lleol agosaf, defnyddiwch ein teclyn chwilio ar-lein.

Cyn agor, cysylltwch â’ch awdurdod lleol i gynllunio eich busnes, i drefnu bod eich gwastraff a’ch deunydd ailgylchu yn cael eu casglu ac i gael gafael ar yr adnoddau hyfforddi priodol. Fe allai gostio arian i chi os na fyddwch chi’n gwneud hyn yn iawn. Mae gweini bwyd sy’n ddiogel i’w fwyta yn gwneud synnwyr busnes da - mae hylendid da yn helpu i atal gwenwyn bwyd ac yn diogelu eich enw da er mwyn i chi gadw eich cwsmeriaid. Mae hylendid gwael yn gadael blas cas.

Mae’n bosibl y bydd gofyn i chi gofrestru fel unigolyn hunangyflogedig a/neu gofrestru ar gyfer Treth ar Werth (VAT). Mae’r prosesau hyn yn rhai cwbl ar wahân i’r broses o gofrestru eich safle bwyd.

Os ydych chi’n awyddus i wneud newidiadau i’ch safle, efallai y bydd angen caniatâd cynllunio arnoch chi.

Bydd gofyn i chi dalu cyfraddau busnes ar y rhan fwyaf o safleoedd a chael trwyddedau ar gyfer rhai gweithgareddau er enghraifft gwerthu neu gyflenwi alcohol neu werthu bwyd poeth rhwng 11pm a 5am.

Isod, rydym wedi cynnwys rhestr o’r pethau y bydd gofyn i chi eu hystyried. Mae rhagor o wybodaeth ar gael yn llyfryn yr Asiantaeth sef: Dechrau Busnes: Eich camau cyntaf i ddechrau busnes arlwyo. Cliciwch ar y ddolen tua diwedd y dudalen hon i weld copi.

Pethau i’w hystyried wrth ddechrau eich busnes

• A ydych chi wedi cofrestru eich busnes?
• A yw cynllun ac adeiladwaith eich safle yn bodloni’r gofyniad cyfreithiol?
• A ydych chi wedi cyflwyno gweithdrefnau rheoli diogelwch bwyd ac yn cadw cofnodion cyfoes o’r rhain?
• A ydych chi a’ch staff yn deall egwyddorion hylendid bwyd da?
• A ydych chi wedi ystyried trefniadau iechyd a diogelwch a diogelwch tân?
• A ydych chi wedi cofrestru fel unigolyn hunangyflogedig?
• A oes gofyn i chi gofrestru ar gyfer TAW (VAT)?
• A ydych chi’n cadw cofnodion o holl incwm a chostau eich busnes?
• A ydych chi’n cadw cofnodion o fanylion cyflog eich staff? A ydych chi’n gwybod sut i dalu eu cyfraniadau treth ac Yswiriant Gwladol?
• A ydych chi’n disgrifio bwyd a diod yn fanwl gywir?
• A oes angen i chi wneud cais am drwydded i werthu alcohol, i gynnal adloniant, i werthu bwyd poeth a diod yn ystod oriau mân y bore neu i werthu bwyd ar y stryd?

Mae’r Asiantaeth yn darparu adnoddau i helpu busnesau bwyd i gydymffurfio â deddfwriaeth hylendid bwyd. Mae’r rhain yn cynnwys Bwyd mwy diogel, busnes gwell (SFBB) sy’n cynnig ffordd arloesol ac ymarferol o reoli diogelwch bwyd. Mae 3 pecyn bwyd mwy diogel, busnes gwell ar gael sef:

1. Bwyd mwy diogel, busnes gwell ar gyfer BUSNESAU ARLWYO BACH
2. Bwyd mwy diogel, busnes gwell ar gyfer BUSNESAU MANWERTHU BACH
3. Bwyd mwy diogel, busnes gwell ar gyfer GWARCHODWYR PLANT

Os hoffech gopïau yn rhad ac am ddim, mae croeso i gysylltu â’r Asiantaeth ar 02920 67 8970. Er gwybodaeth, mae’r pecynnau hefyd yn cynnwys DVD sy’n dangos amrywiol sefyllfaoedd go iawn a all eich helpu i ddysgu mwy am hylendid bwyd. Mae’r DVD yn addas ar gyfer rheolwyr busnesau arlwyo neu ar gyfer hyfforddi staff sy’n cael eu cyflogi yn y maes hefyd. Mae’r pecynnau ar gael ar-lein drwy glicio ar enw’r pecyn perthnasol uchod.